Nánar
Íbúakjarni Þorpsins við Jöfursbás er samkvæmt skipulagi hluti af grænu íbúðarsvæði við sjó. Uppbygging reitsins einkennist af þyrpingu fjölbýlishúsa af ýmsum stærðum, byggingargerðum og hæðum. Leitast er við að skapa aðlaðandi umhverfi með samfélagslegri blöndun. Rammi hverfisins er samfellt, grænt svæði sem tengir saman stök hús og húsaþyrpingar. Andrými þetta er aðgengilegt fótgangandi og hjólandi ásamt sameiginlegum svæðum, s.s. matjurtargörðum, leiksvæðum, grillaðstöðu o.s.frv. Allar íbúðarbyggingar eiga það sameiginlegt að tengjast græna svæðinu á afgerandi hátt, bæði með göngu- og hjólastíg meðfram strandlengjunni, sjónásum og aðalinngöngum húsa. Íbúðir á jarðhæð erum með verönd sem skilur að almennings- og einkarými. Meginaðkoma bílaumferðar er um breiðgötu sem liggur á milli athafnasvæðis til suðurs og íbúðarsvæðis við sjó til norðurs.
Reykjavíkurborg hélt samkeppni um hönnun íbúðakjarna fyrir ungt fólk og fyrstu kaupendur á fyrir fram ákveðnum svæðum í borginni. Þorpið vistfélag og samstarfsaðilar höfnuðu í 2. sæti og voru því nr. 2 í röðinni um að velja sér svæði til uppbyggingar. Þar var sjávarlóðin Jöfursbás 11 í Gufunesi fyrir valinu.
Hugmyndafræði Þorpsins vistfélags að vistvænum og hagkvæmum íbúðum fyrir ungt fólk og fyrstu kaupendur var unnin af Runólfi Ágústssyni, verkefnastjóra, Guju Dögg Hauksdóttur, arkitekt og umhverfisfræðingi og Áslaugu Guðrúnardóttur höfundi bókarinnar Mínímalískur lífsstíll. Hugmyndafræðin gengur í stórum dráttum út á vistvænt, ódýrt smáíbúðahverfi þar sem einfaldleiki og umhverfisvitund eru lykilþættir.
Ungt fólk og fyrstu kaupendur sækjast eftir þaki yfir höfuðið án þess að þurfa að ráðstafa nær öllum framtíðartekjum sínum í húsnæðið. Ungt fólk vill ferðast og skoða heiminn og hefur takmarkaðan áhuga á því að vinnulaunin fari öll í húsnæðið. Það gerir aðrar kröfur til lífsins en þeir sem eldri eru, kýs einfaldleika, frelsi og græna kosti.
Mínímalískur lífsstíll fjallar meðal annars um það að hamingjan felist ekki í því að eiga sem mest heldur frekar að njóta þess sem maður á og velja það af kostgæfni. Með þá hugsun að leiðarljósi voru fyrstu íbúðir Þorpsins við Jöfursbás í Gufunesi hannaðar. Öll nútímaþægindi með sem minnstum tilkostnaði. Íbúðirnar litlar og allar eins utan fjölda herbergja. Herbergin mismörg, gengið inn í þau öll frá alrými (stofu og eldhúsi) og þar af leiðandi enginn gangur sem gjarnan er fremur dautt rými. Áhugasömum kaupendum var gefinn kostur á að skrá sig og tilgreina óskir um herbergjafjölda og íbúðirnar 137 voru skipulagðar með tilliti til þess. Þannig eru í Jöfursbási 11; 4 stúdíóíbúðir, 22 2ja herbergja, 61 3ja herbergja og 49 4ra herbergja íbúðir.
